Murugo

Asalaamu Calaykum waraxma.

Waa Tix gabay ah oo la magac baxday Murugo Hadda uun curatay. 06/11/2017 akhris wanaagsan.

Maansadan la gawracay murtida muruqa loo siibay
Ee aan macnihi gabay lahaa meella lagu sheegin
Ee magan xayaysiis u yahay een martabad haysan
Ee maxamedoow dhimatay baan aad u murugooday

Garta murugtay xaajada ninkeed maaro gelin waayay
Ee markhaati been luhu u furay maliyo tuu doono
Ee muqayiliintii naqeen Diinna lagu moosin
Ee marduufka jaadka ah gashay waan ka murugooday

Macne dawladnimo waa inay maal wax gelisaaye
Madax horu mar sheegaysa oo aan midh qabanaynin
Oo maalin iyo layl wuxuun male awaalaaya
Oon mashruucba dhallinta u furayn waan ka murugooday

In aad muhindis curiya tahood qalinka maalayso
Maskax aan la maalini dhakhsay mood u noqotaaye
Ardaydii mar hore soo baxdee meelo sare gaadhay
Majaaliista qaad kaan ku nacay oon ka murugooday

Nimaad muruqa iyo xoogga iyo miiganida yaabto
Ood  caafimaad maxamedoow muxubbo eegayso
Oo aan marqudha xoogsi tegin madhanyay jeebkiisu
Oo shaxaad u maraysta uun waan ka murugooday

Masuul daacadnimo ay bulshadu mooska ugu foodday
Oo miigganaan laga rabiyo maamul qurux diisa
Oo magic qabyaalada xilkii meerto uga yeelay
Oon dastuurka maamuus u hayn waan ka murugooday

Musuq maasuq kuu muuqa oon laga midhaabaynin
Oo ay masiirku bulshadu murudka leefayso
Oo aan sharciga maxamedoow laba marsiinaynin
Maxakamadda oon xoog lahayn waan ka murugooday

Masaakiin dad aad mooddo oo meeshan kula jooga
Oo mushaaxa suuqayada baryana midigta loo hoorsho
Mabda kale u hooseeyo oo maamul kale haysta
Murta iyo dhibkay soo wadaan waan ka murugooday

Muslimkaa la eedaynayee magaca loo yeelay
Ee meeqaamki diintiyo xaqii meesha laga saaray
Ee aan la muunayninee maagga lagu laayo
Ee maraykan iyo gaal nugul waan ka murugooday

Marsadii berbera ee dalkuba wada macaashaayay
Ee markii aad eegtaba nimcadu meel kastaba taallay
Ee mood ka iyo xoolihii lays dhex marinaayay
Shisheeyuhu inay meersadeen waan ka murugooday

Macdantii dhulkeenee dihnayd magaca soomaali
Ee ciidda maarriinka badan maadha lagu sheegay
Een madawga hoos looga dagin maarar la jeexin
In aan mootar lagu eegin wali waan ka murugooday

Marwo uu nin qabo oo walaal debedda meeraysa
Oo muraad la aan suuqyadaa madaxa taagaysa
Oo aan midkaa sharaftidii meella ku hambaynin
Xisbiyada  siday ugu milmeen waan ka murugooday

Nin masuul inuu yahay dadkuba aad u wada moodo
Oo furay miskiin tuu qaboo gooyay meherkeeda
Oo carruurti meel ay jiraan mahaya mooggaasa
Oo aan masruufaynin baan kaa u murugooday

Miidaanka dawgiyo wadada marinka gaadiidka
Wadayaal is miidaamisa oo meel kastaba jiidha
Maamulkii taraafiiga oo joogahaa maqan ah
Oon cidiba maarayn karayn waan ka murugooday

Masjid ay dhiseen muuminiin mawle garansiiyay
Miyi iyo magaaliyo  dhul kale moosin iyo beero
Oo makarafoonada la sudhay mu addin yeedhaayo
Inta badan inay madhan yihiin waan ka murugooday.

Wa billaahi tawfiiq. By Faysal Awcabdi Cambalaash

Meelaha kala duwan ee Tixdu wax ka sheegayso haddii aad iska dhex aragto macnuhu ma aha in lagu dhalliilay si gaara haw qaadan ee talo guud iyo inaad wax ka beddesho wixii aanad dhinaca saxda ah ka joogin ayay noqonaysaa ujeedada guud mahadsanidin.

Nabaddu waa guul

Garbaha iyo haddaan laysla qaban labada geesoodba
Guntiga iyo haddaan loo adkayn gibisha xeerkeeda
Oo aan guudka laga dhawrahayn way gedmanaysaaye
Gaadhka aynu haynooy dhammaan guushu waa nabad e

Geediga haddaan loo lallabin guure socdkeena
Haddaan sahaydu yay go'in in badan loo gunnayn talada
Oo aan guddoon madaxdu odhan way gedmanaysaaye
Muska iyo gurada aan dugsino guushu waa nabade

Gummac iyo rasaas iyo hadaan guranno baaruudda
Garnayl iyo haddii aan madfaca gaar isugu beegno
Oo aan garasho laalloo dadyohow goyno ubaxeena
Dagaal gaban ma koriyee Waar yaan geesi iga lee'an

Guddi iyo duqay iyo hadaan guurti lagu saarin
Gadh cad iyo aqoon iyo hadaan garasho loo doonin
Oo aan dulqaad laysu gayn waa geb xaajaduye
Geed u yeesha eey oo bud dhiga nabaddu waa guul e

Sikhir eebbe

Sagaalkii bilood eed sahraay sugaysay weedhayda
Sahankii jacaylkeen rajada soofka ugu foofshay
Saldhiggiyo jawaabtii haddaan saafo ereygayga
Allay lehe dad lama aad sinide suubban baad tahay e
Sara joogga hilibkaaga siman socodka miisaaman
Sanqaroorka sunayaasha iyo sinaha duudkaaga
Samaantiyo dabcigan kuu saxee saatir kugu deeqay
Samirkaaga weeyaan waxaan duniba siistaaye
Salma iyo suleekhiyo sabaad saynab iyo luula
Inta gabadh si uun loo calmado waad ka sidataaye
Suuraddaada oo qudha habluhu sina ma gaadhaane
waxaad tahay suhuurtii dalkeen sugayay waayaaye
Soomaalilaand baad ku tahay laydh siraad badan e
Sayidkaa ku dhalay baa wanaag saani kuu baray e
Haddaanay hooyo kuusoo sifayn talana kuu suubbin
Ama aanay surnikii wacnaa iyo samaha kuu sheegin
Sahaalay u baydhaa yartii seegtay gacanteede
Sahraay adigu reer baad ka timi hibo ay saarrayde
Si kastaba markaan kuu dayeen sariyo guud eegay
Sawjad wiilka kaa yeesha ee meher laguu saaro
Saatir hayga yeelee anigu waan ku sugayaaye
Sambabkayga caashaqu walaal wuu ku sugan yay e
Kuu salcaamay salaw buu i baday siibna hilibkay e
Kaam seexdo soor kaaga tagay diirki iga saarye
Jacaylkaagu soodh igu biree seedda iga gooye
Suudigaan wareegaa dartaa socod wareegiiye
Anigoo socdaan qayliyaa sabigu yaabaaye
Sahwiyay oo salaaddi dartaa wanigaan sixin e
Sikhir oo ilaahaw adigu noo sug tii wacan.....

Waayo waayo iyo taariikh.

Is hellaye

Waqal hooray heegiyo daruur guga horraantiisa
Hir magoolay ubax heenso furay kaymo wada hawray
Halo dhalay horwayn wada irmaan haamo wada buuxa
Hiyi nabada hoos iyo qabaw heeso lagu dheelay
Hor ilaahay heerbaad la tahay haabka noloshaase
Hareeraha markaan dayay hablaha quruxda hoogaanshay
Mid aan kuba hareer dhigo intaan inan la haasaaway
Hore looma arag oo haddeer hooyo may dhaline
Hiddo wacan haween ugu fil roon haybaddiyo muuqa
Habsamaan hubqaadkiyo dhismaa hadalka toostoosan
Hanaankiyo siduu eebahay haqabbax kuu siiyay
Halista iyo meel aad u nugul gaadhay hanaqiiye
Wadnahaad hubaal igaga taal hogatay beerkiiye
Is hellaye alloow noo hibee hoyna nagu soo sin....

TACADDI

Asalaamu Calaykum waraxma tullaahi wabarakaatuhu

Salaanta islaamka ka dib Waxaan halka ku soo gudbinayaa Tix gabay ah oo cusub Lana magac baxday TACADDI, Tixdani waxay daba socotaa, aragtidana la wadaagtaa Tix uu tiriyay Qorane Wacays Gabay Xoog oo ayaamo yar ka hor Shaashadaha ka muuqatay. Run ahaan tixdaasi waxa uu abwaanku ku taabtay qodob aad u muhiim ah.




Waxa dhowaanahan soo kordhay Abwaan sheegasho iyo suugaan aan tayo lahayn. waxa badatay is dhexyaacii waxaana meesha ka baxay Haybaddii uu abwaanku lahaan jiray.




Anigu tixdan waxaan ku tilmaaya in yar oo ka mida meelaha ay ceebtu ka timi, waxaanan leeyahay Gabaygani kuma socdo ama dhaliil uma aha cid kasta oo gabay toosan oo wanaagsan tirisa ee waa inta Iska jeclaatay inay Gabyaanse aan waxba hayn.




Tacaddi waxa ay soo baxday Maanta oo Taariikhdu tahay, 12/09/2011 Waxaanay ku billaabmaysaa sidan akhris wacan..






Indhowayd tilmaan gabay ma odhan kumana taamayn e
Ma toostoosin maansooyinkii kumana taagnayn e
Kolba anoo ka tagay bay dad kale turun turreeyaane
Tacaddiga markaasaan nacaa loola tagayaaye
Tiraabtiyo markaasaan marshaa tix iyo miisaan e.


Tiyaatarka iyo haddii aanad iman goobta laga teedsho
Ammaan shicibku taladaada maqal waa bar kuma taalle
Tiixuba dhulkuu helo ma duro meel tamuux badane
Taabashona gunaad laguma dhayo milil ku taagnaaye
Tiraabtuna sideedaba bulshada way ku tarantaaye



Qoranoow tixdaadiyo murtidi saaka ii timiye
Timaha iyo xaadday mar qudha taabatoo kacay e
Taf wareen Halbawlaha ayay taw dhex tidhi doore
Dad ma wada tusmaystee anigu galiyay taariikh e
Anigana i toyo oo i maqal tuduca aan reemo

Tixda gabay ragbaa tiring ogaa tan iyo haabiile
Taariikhda nimankii galee taajka lagu saaray
Nimankii tilmaantiyo lahaa talada miisaaman
Tubta geedka nimankii murtida taxayay goorteeda
Nimankii golaa tay rabaan dhigayay taallooyin
Dagaal laysku tiigsaday raggii tooda marinaayay
Tolka nimanki guulguuli jiray goor la kala taahay
Turxaantiyo raggii cudur ka iyo tirayay hiinraagga
Tacliintiyo raggii qori ogaa teebka arartooda
Aakhira raggii tagay rabbigu haw tamilo guulle





Rag halkuu ka tooreeyay buu liiti tubanyay e
Tuhunkaba waxaw daran dar aan tanaadaa garan e

Tabaq dhoonka maansada ku dhacay la isla tiigaalay

Nin waliba takaariga marsaday say la tahay tiisa

Sida loo taxoobsaday murtida Taajir waw magane

Xishoodkii dad wada tuuray oo timaha soo xiirtay
Haddaan sacabka loo sii tumayn kumaba taameene
Tollaahaan ku dhaartaye abwaan’ taana lala yaab

Halabuur rag tuhunkeedu galay oon tif garanaynin
Oo tookh abwaanimo sita shaadhna loo tolay
Oo tumaya hawraarta oo tiifay magaceeda
Afsoomaaligooduna takhlamay tuurna kala leeyay



Tiifiiga qaarbaa la yimi shuux tog soo rogay
Haddii aan tikraar iyo hangool tooda lagu sheegin
Ama qodob takhlaayiyo lahayn taandho lagu joojo
Ama aan dawlad tabantaabisoo talisa loo haynin
Ama aan shicibku tii leexatiyo toyanin kii wayda
Darra ay tahniyadayna yaan gacanna loo taagay



Abwaanimo kuwaa toogtay ee taagay giriyaadka
Inta ay wax soo tabaq dhabeen la isku toostoosshay
Ku tilmaamay waa gabay ayaan cidi hor taagnayne
Tollaayeeydu waa ciil markuu taahay gabaygiiye
Tamar yari miyaa lagu hubsaday taranki suugaanta?




Wa billaahi tawfiiq

Aan Janada Gaadhno

Aan janada gaadhno waa tix gabay ah oo soo baxday 08/09/2011 waana tix si mug leh looga fiirsaday farshaxanka iyo dhismaha kollay idinkaa xukumi akhris wanagsan

Jalbeeb gabay baryahan jaallaleey qaydka uma jiidin
Kuma joogsan oo waaban jaray jabaq lihiisiiye
Aan u jeesto oon jiilka furo idinla jaawayso
Jigre qori mafdaca jawleh iyo miino lagu joogo
Jeefaaf naxdina jiidh dabciyo jixinjix aan reebin
Juuqdaydu waa halis haddaan jalaq ka dhawraaye
Aan jareeyo tani waa jacayl jiidhay dhimirkiiye

Kuu jabay Jarbaan kaaga dhacay Jeexyo iyo buuro
Kuu jirrooday jiif kaaga tagay jidhidhicaan qaaday
U jarmaaday jiidhaan u kacay jarinta awgaaye
Libaax jawle aar soo jirdacan goosha jibinaysa
Jilbis halaq abees jiifa iyo jabiso xoogwayn leh
Hariimacadka jeeraaran ee orordka jiireeya
Inta bahalo kaymaha jiqda ah noocba dhinac joogo
Ula jaaray awgaa dartaa jiidhay geedaha e
Jalka iyo jidiinkii Cuntada waan ka joogsaday
Jalbeebta iyo haasaawihii daayay jabaqdiiye
Adaan kuu jucuurrahay walaal waa jacayl dhabahe
Ii jawaab jinnaha kaalay qabo aan janadda gaadhno

Kuu jibbooday kaa daba jabshoo jiibtu waa ani
Ku jeclaaday waan kuba jantoo jeel anaa qaba
Anoon jimicsan jeedaaladaan jiirta korayaa
Ma jalleeco suuqyada hablaa jalaqsanee buuxa
Jidhkaa wacan dhismaha jaanta go’an joogga quruxdaada
Jogoseey tallaabada jagta ah jookha midabkaaga
Jamaal samida laafyaha hilbaha laysku soo jaray
Jinniyaddaada weeyaan waxaa jiidhay madaxiiye
Ii jawaab jinnaha kaalay qabo aan janada gaadhno

Ka jiciirtay jeeskiyo rugtii diiday jagadayda
Is janjeedhshay jeegada malmalay jinac sidiisiiye
Sharci jabiyay jeel laygu tuur jeedal igu hoobay
Xadhigga iyo jucuurkaan u galay jaawo heliddaada
Jidgooyada jikaarkaan mutiyo muranka lay jiiday
Joodari furaash iyo saliba jaalle uma xiiso
Ka jeelmaday hurdada oo dartaa waan jirrabany e
Cirka jawle dhaxan jaynafaan joogay dabadaaye
Jeerin qodax leh jiic iyo maraa geedo jidhifaystay
Jirrid gaaban kurtin ay jareen jabad abaaroobay
Intaan meel cidla ah jiifsadeen adi ku jeedaashay
Jabaq kuma dhameeyee runtaan kuu jarjarayaaye
Ii jawaab jinnaha kaalay qabo aan janada gaadhno

Is jujuubka jirrabkaan mutiyo hadawga aan jiidhay
Jaho seegga jiiftaanka baas dayaowga aan joogo
Jugtaan qabo jaraa laygu xidhay qoofal igu jeeban
Jirri iyo canaasiir juglaha kibir i jaajuusay
Jareex iyo dagaalkaan muttiyo jawda igu gaadhay
Kalgacaylka jeexaan u galay daadki igu jiitay
Jilbahaan u dhacay biixidii jeexaday hilibkayga
Dacdarrada i kala jeedisee igu jigraaraatay
Jinaw meedayeeydii waxaan belo u soo joogay
Aduunbaan ku soo jarinayoo kuu jibbaysnahay e
Ii jawaab jinnaha kaalay qabo aan janada gaadhno

Cirkoo jawle daad soo jidhfacan jibinta yeedhaysa
Onkod jalawleh hillaacaysku jira dhibica jaawaystay
Calcalyada jidhaamaha gashiyo gabiga ceel jiidhay
Jirddo gooye igu soo fatahay wabiga soo jeexmay
Jacaylkaaga awgii dardhaday oo jirbay helaye
Jooxaadhtan juukaha qaboow jiidda barafoowday
Habro jabista lagu jeelmadee jiidhay odayaasha
Dartaabaan baddaa ugu jiraa jidin caddaad kaase
Ii jawaab jinnaha kaalay qabo aan janada gaadhno

Tix gabay ah oo la magac baxday TALO

Asalaamu Calaykum Waraxmatullaahi Wabarakaatuhu.

Waxaan halkan ku soo gudbinayaa Tix gabay ah oo la baxday TALO. Talo waa tix su guud uga hadlaysa, Nincada alla ina siiyay, iyo sida aynu ugu faanfaanno ee aynaan u dareemin in ay jiraan dad waxa badani ka dhiman yihiin.

Adduunka waxa is garab yaal samo iyo xumo, Dhereg iyo gaajo, Cudur iyo caafimaad, Samo iyo xumo, Dhib iyo dheef, Waxa aad arkaysaa laba walaalo ah oo midna Allaha awoodda lihi ubad ugu deeqay, kii kalena aanu wax ubada hayn. Adduunku iskuma dheelli tirra, inteena wax ka haysaa inteena aan ka hayn ama ay ka dhantaalan tahay inaynu ku digano waxa ka wanagsan inaan u samirsiinno. Isku naxariisanno isna gacan qabanno. Si allaha awoodda lihi inoogu naxariisto waxa aan idhi TALO ila akhriya ila dhagaysta.

Muddo dheer tafiirtii murtida kumaba taamayne
Kuma tudhanin maansooyinkii aad tirsanayseene
Turqinteeda waataan ka tagay iyo tiraabtiiye
Haddan gabay tis qaad lagu alkumin tiirna lagu joojin
Oo aan tix miisaaman iyo tooxba lagu giijin
Ama aan hadalku taariikhda galin wayska turufaade
Waxaan tayda uga aamuseen toojo uga yeelay
Markuu midha yarii wada tirshee la isku tuurtuuray
Aanse kuu tusmeeyee murtidu toyasho weeyaane
Bal aan tuujo maankee ka guro tibixda aan deexo

Wax badan baanan teebkeeda qorin oo i tabayseene
Qalbigayga waxan taabtay ee aan ka tagi waayay
Bulshadaan turxaantiyo u nacay taagdarriyo liide
Tuhunbaan arkaa aan is idhi yaanu tagin doore
Taladaydu waa guud qof qudha taabo ma lahayne
Bal tusaale aan soo dhigee togo wanaaggeeda

Inkastood tilmaamaha murtida qorayso taariikhda
Inkastood tusaalaha cilmiga tiriso suugaanta
Inkastood ku tiigaasho ood Tahan wax gaynayso
Waa tacab qasaar xaajadaan kaydka loo tebinne
Maahmaah tis qaaddiyo hadaan sheeko laga tooyan
Ama aan tiraabtii kastaba weedha lagu toosin
Tayo ma laha maansadu hadaan qodob ku taagnayne
Iska tororog lee meel cidla ah baad ku tumaysaaye

Afartaa tiriiggii naxwaha taag ma qabadsiiyay
Mahiigaan tafaa soo rogtoo shubay taxliishiisa
Oo dhibicu teelaha qabsaday taran hillaacaaya
Ooy togaggi soo wada rogeen daadka tiro belay
Aniguna tabtaasaan murtida gabay ku teedshaaye
Bal aan tuujo maakee ka guro tibixda aan deexo

Tabaalaha adduun waa wareeg tan iyo haabiile
Dhibtu waxay ku tarantaa markaan laga tanaadayn e
Haddii aad tawiday oo nasiib kuugu jiro taada
Tummaatidu markay duulal kale taabato ey gaadho
Ha u tirin inaad tahay mid aan turun-turroonayne
Isu tudho afkana taako saar erey ha soo tuurin
Ha tilmaamin ceeb kaa tan roon taaha ha u fiirsan
Nabsigu waa mid tiigsada xaqee yuu ku tabin waayo

Toban iyo hadaad laba habeen taagni ugu joogto
Tacab iyo haddii aad wax qabad muruqa taagayso
Haddaad noodhka soo toomisood taabtay nolosheeda
Timmirtaba dadbaan helin adduun wuu is tabayaaye
Gacan inaad u togatiyo lagaray taano ugu deeqe
Tacaddiga waxaa kaaga wacan dhawr taloo kale e
Bal u tudho naftaadoo ha falin tu aanad yeesheenba

Afartaa tiriiggii naxwaha taag ma qabadsiiyay
Mahiigaan tafaa soo rogtoo shubay taxliishiisa
Oo dhibicu teelaha qabsaday taran hillaacaaya
Ooy togaggi soo wada rogeen daadka tiro belay
Aniguna tabtaasaan murtida gabay ku teedshaaye
Bal aan tuujo maakee ka guro tibixda aan deexo

Hungurigii taraaraa marbuu tahar ku siiyaaye
Talaxiyo marbuu kugu rifaa taa'uf iyo liid e
Wuxuu kugu tikraaraa jirido jinaci Taallaaye
Gobanimo adoo taawinkara sharafi tuullaatay
Iimmaanka lays kama tiree qaado marin teedsan
Wanaagana ha turufayn samaa lagu tis qaadaaye

Afartaa tiriiggii naxwaha taag ma qabadsiiyay
Mahiigaan tafaa soo rogtoo shubay taxliishiisa
Oo dhibicu teelaha qabsaday taran hillaacaaya
Ooy togaggi soo wada rogeen daadka tiro belay
Aniguna tabtaasaan murtida gabay ku teedshaaye
Bal aan tuujo maakee ka guro tibixda aan deexo

Cirka oo intuu xays tirsaday uu todoba hooray
Oo xareedu tooraha jartooy harada taameeshay
Oo tigaada iyo maadha iyo teel u baxay dooggu
Barwaaqada ilaah kuu tumee teedsan dhinacaaga
Dad abaartu wali ay taftaaf ugu tanaadayso
Oon daruurtu toodaba dul marin dhibicna aan tooyan
Ayaa dunida tuulane u tudho hadalka taagtaagan

Tarantiyo caruurtuu rabigu adiga toomshay
Ee iskuulka kuu tagaya ee teebka baranaaya
Qaar diinta soo taransadeen ama se tawxiidka
Til-til maamiddoodiyo ku faan tiiqsi hadalkaaga
Dar tagoogba aan laga ag dayin timaha qaar feedha
Taqwadluhuna ubad siinnin baa tuban hareeraaye
Ereygaaga tudho aakhiraa laysla tagayaaye

Tamartiyo haddaad xoogga iyo muruqa tuurayso
Haddii aad is tuhun caafimaad tiigsi soconayso
Toxodh-toxodha orodkaa xun iyo timahan sii jiifa
Kibir lama tisqaadshee dantaa lala tacaalaaye
Dar ay qaaxo feedha tagtoo tiibi lagu sheegay
Aan tallaabsan Karin baa jiree aayar tebi weedha

Rabbibaa wax taban taabiyee tuugso magaciisa
Tilmaan saxa allaa garanayee saaro taladaada
Toobaddana ilaahay u celi Taadi may imane
Taagyare wax sii aakhiray baanka kuu tagiye
Tusbaxana ha dhigin waa inaad faralka taagtaaye
Takbiirtana adkee yaan laqwigu taymka kaa ridine..(Time)
Tawfiiq dabeecada lahaw oo tolnimo yeelo